MATUMLA AMPANIA KUMMALIZA MCHINA

Mwandishi Wetu

Wakati bondia Mohamed Matumla Jr akiwa katika mazoezi ya mwisho mwisho

kumkabili Wang Xin Hua wa China, wenzake Thomas Mashali na Karama

Nyilawila wametoleana uvivu huku kila mmoja akijigamba kutwaa ubingwa

watakapozichapa Machi 27 kwenye ukumbi wa Diamond Jubilee, jijini Dar

es Salaam.

Matumla Jr atazichapa na Hua pambano la super bantam la ubingwa wa

dunia wa (WBF World Eliminate) pambano maalumu kwa mabondia hao la

kutafuta tiketi ya kucheza pambano la utangulizi kwenye lile la nguli

wa masumbwi duniani, Manny Pacquiao na Floyd Mayweather la Mei 2.

Kama Matumla atampiga Hua kwenye pambano lao la Machi 27 na kuonyesha

kiwango kizuri atapata nafasi ya  kucheza pambano la utangulizi

kuwasindikiza nguli hao wa masumbwi duniani watakapovaana Mei 2 jijini

Las Vegas.

Akizungumza katika mazoezi yake yanayoendelea kwenye gym ya Oil Com,

Keko jijini Dar es Salaam chini ya kocha wake ambaye ni baba yake

mzazi, Rashid 'Snake Man' Matumla, bondia huyo alisema hataki kupoteza

nafasi ya kucheza kwenye pambano la Mayweather na Pacquiao.

"Najua ugumu wa pambano langu na Hua hivyo sitaki kufanya mzaha, niko

fiti na sasa nafanya mazoezi mepesi ili kumkabili lakini pia sitaki

kupoteza nafasi ya kuwasindikiza nguli wa masumbwi duniani kwani ni

pambano ambalo 'litanitoa'," alisema Matumla Jr.

Kocha wake alisema, hivi sasa bondia huyo anajifua katika mazoezi ya

mwisho mwisho ambayo ni ya wepesi na kumweka tayari kumkabili Hua.

"Mudy yuko fiti, nimekuwa naye katika mazoezi, kiwango chake

kinaridhisha na sasa yuko katika hatua ya mwisho kabisa ambayo ni ya

mazoezi mepesi ya kumuweka tayari kwa pambano," alisema kocha wa

bondia huyo.

Promota wa pambano hilo, Jay Msangi alisema ili Matumla Jr apate

nafasi ya kuwasindikiza Pacquiao na Mayweather ni lazima aonyeshe

kiwango kwenye pambano lake na Hua.

"Tayari tumemwambia Matumla Jr vigezo hivyo kwani si ili mradi

kushinda bali aonyeshe kiwango kama ni ngumi ziwe ngumi kweli kwani

hawezi akacheza kwa kukumbatia na kushinda kwa pointi alafu apewe

nafasi ya kucheza Las Vegas, kule mashabiki wanataka waone ngumi hivyo

Matumla Jr anapaswa kupambana Machi 27 ili apate nafasi hiyo,"

alisema.

 
Siku hiyo pia, Japhet Kaseba atazichapa na Mada Maugo wakati Karama

Nyilawila akionyeshana ubabe na Thomas Mashali ambapo mabondia hao

kila mmoja amejigamba kutwaa ubingwa.

"Sina hofu na mpinzani wangu kwani kiwango chake nakijua na amekuwa

bondia wa kukimbia kimbia ulingoni hivyo ajiandae, cha msingi ni

mashabiki wangu kujitokeza kwa wingi kunipa sapoti," alisema

Nyilawila.

Wakati Mashali akijinadi kuwa yeye ataonyesha vitendo ulingoni siku

hiyo kwani nafasi ya kupigwa na Nyilawila haipo kwake na kusisitiza

kuwa yuko fiti na hatarajii kama mpinzani wake atamaliza raundi zote

siku hiyo.